'O PRESEPIO VIVENTE 'E SAN FRANCISCO

 

'a scena'e stu presepio,'a putechella,

riale, cchiù attraente 'e mò fa ll'anno.

cu ll'angelo'e pasture, sott' 'a stella

a stu Criaturo mò stanno cantanno.

 

'o uagliunciello dint' 'a votta ' e vino

'o fruttaiuolo e 'a chioppa 'e vicchiarelle

'a serenata a suono 'e mandulino

'e ssemmenzelle d' 'o solachianielle

 

casecavalle appise, pastaiole,

muline 'e grano, 'a casa d' 'e furnare,

ferrare, masterasce, casaiole,

vacche, ferracavalle e lavannare.

quasi 'nu suonno, 'na visione 'e cielo.

ca fa penzà 'a nu munno d' 'o ppassato.

'na melodia luntana, int' 'a nu velo.

'a gloria 'e stu Bambino appena nato.

 

'o voio e l'asiniello p' 'o calore

'e chesta cunnulella 'a cumpagnia,

cu San Giuseppe padre, cu ll'ammore

p' 'o figlio' e' a mamma soia "Gesù e Maria".

 

Lucio Mastellone

 

scritta in occasione della II edizione del

Presepe Vivente di San Francesco - Natale 2002